Shërbimet e CIP dhe ISBN

Biblioteka Kombëtare e Kosovës “Pjetër Bogdani” njofton se të gjitha informacionet dhe kërkesat lidhur me shërbimet e CIP-it dhe ISBN-së do të mund të adresohen dhe pajisen vetëm përmes email adresës: cip.isbn.bkk@gmail.com.

Po ashtu, CIP-i paraqitet në një format të ri, si rrjedhojë e disa ndryshimeve brenda Bibliotekës Kombëtare të Kosovës.

P.S.: Sipas Ligjit për Veprimtari Botuese dhe Librin, ‘Çdo botues privat dhe çdo institucion publik që boton publikime në Kosovë dhe që janë të dedikuara për përdorim publik, është i detyruar t’i dërgojë Bibliotekës Kombëtare të Kosovës pesë kopje të çdo publikimi brenda 30 ditëve nga data e botimit’.

Agjencia Kombëtare e ISBN -së

Sistemi i ISBN-së (Numri Standard Ndërkombëtar i Librit) në nivel ndërkombëtar ka filluar të funksionojë në fillim të vitit 1970. Ky sistem është zhvilluar dhe vijon të zhvillohet, të ruhet dhe të koordinohet vite me radhë nga Agjencia Ndërkombëtare e ISBN-së.

Selia e Agjencisë Ndërkombëtare të ISBN-së për disa dekada ka qenë e vendosur në Berlin. Nga viti 2006 kjo agjenci ka ndërruar vend dhe është vendosur në Londër. Tani rreth 160 vende të botës janë të integruara në mënyrë aktive në sistemin e ISBN-së, mes tyre vendeve, që nga viti 2001, gjendet edhe Kosova.

Sistemi i ISBN-së u zhvillua në kohën kur kompjuterët u bënë të rëndësishëm dhe të domosdoshëm në botë. Një numër i tillë ndërkombëtar ishte zgjidhje ideale në kohën e kompjuterizimit. Kështu, për nevoja të ndryshme në procesin e qarkullimit të librit, në vend që të bëhen përshkrime të gjata bibliografike, është i mjaftueshëm numri me vetëm disa shifra.
Agjencia Kombëtare e ISBN-së funksionon brenda Bibliotekës Kombëtare dhe Universitare të Kosovës. Ajo përkrah në mënyrë të vazhdueshme botuesit e Kosovës për integrimin e tyre në sistemin e ISBN-së dhe pajisjen e botimeve të tyre me këtë numër.

Agjencia Kombëtare e ISBN-së:

Përkrah pjesëmarrjen në sistemin e ISBN-së në vend;
Vendos marrëdhënie bashkëpunimi me botuesit;
Alokon identifikuesit për botues dhe mban regjistrin e botuesve dhe identifikuesve të tyre;
Informon botuesit për implementimin e sistemit në mënyrë korrekte dhe të përshtatshme;
Siguron materiale dhe burime të cilat ndihmojnë në implementimin korrekt të ISBN-së;
Informon botuesit për gabimet në përdorimin e ISBN-së;
Mban relacione me Agjencinë Ndërkombëtare të ISBN-së në interes të botuesve të vendit;
Raporton rregullisht pranë Agjencisë Ndërkombëtare të ISBN-së.

Agjencia Kombëtare e ISMN -së

Biblioteka Kombëtare e Kosovës “Pjetër Bogdani”, dikur e njohur si Biblioteka Kombëtare dhe Universitare e Kosovës, ka krijuar Agjencinë Kombëtare të ISMN-së për Kosovë, e cila funksionon që prej vitit 2003. Agjencia Kombëtare e ISMN-së është anëtare e Agjencisë Ndërkombëtare të ISMN-së, me seli në Berlin.

ISMN-ja është krijuar për të identifikuar veprat muzikore, ndryshe nga ISBN që mundëson identifikimin e librave dhe materialeve të ngjashme. Duke qenë standard i pranuar ndërkombëtar në ISO (ISO 10957), ISMN-ja përdoret në shumë shtete të botës për të mundësuar identifikimin, tregtimin dhe shkëmbimin e veprave muzikore dhe pjesëve të tyre në mënyrë efikase.

Nga një numër 10-shifror, ISMN-ja është shndërruar në një numër 13-shifror nga viti 2007. Veprat muzikore në Kosovë, të cilat marrin ISMN, të vëna nga Agjencia Kombëtare e ISMN-së me seli në BKK, identifikohen me serinë 801950 – 801969. Një numër i plotë i ISMN-së përbëhet nga disa elemente:

Iniciali ISMN, i cili i shtohet numrit të ISMN-së për qëllim dallimi nga ISBN-ja, apo standardet e tjera;
Kodi ndërkombëtar ‘979’;
Kodi ‘0’, i cili zëvendëson shkronjën ‘M’, që është përdorur më herët në ISMN-në dhjetëshifrore;
Numri bazë i serisë, p.sh. ‘801950’;
Numri i identifikimit të njësisë ‘01’, dhe;
Shifra e kontrollit, p.sh. ‘7’, e cila tregon validitetin e ISMN-së.

Duke i bashkuar të gjitha këto elemente të përmendura, fitojmë një ISMN të plotë valide 13-shifrore:

ISMN 979-0-801950-01-7